Denmark-a synagogue leh cafe beitu kaphlum

Denmark khawpui, Copenhagen-a cafe leh synagogue beitu nia hriat chu police-te'n an kaphlum tih an sawi.

Denmark police-te chuan kar kalta Inrinni khan Krudttoenden cafe-a event neihna hmun chu silaia beih a ni a, a hnuah Krystalgade-a synagogue beih a ni leh bawk, an ti. Cafe a beihna hi Swedish cartoonist, Lars Vilks-a'n 'Art, Blasphemy and the Freedom of Expression event' a neihna hmun a ni a, Vilks hian tun hmain Prophet Muhammed lem a ziah danah sawisel a lo tawk tawh a ni. He hmuna silai hmehpuah a nih vang hian mi pakhat a thih bakah midang pathumin hliam an tuar a ni.

Cafe beitu nia rinhlelh hian amah man tumtu police-te chu a lo kap leh a, police-te hian an kaphlum ta a ni. Midang inhnamhnawih an awm leh awm loh chhui zui mek a nih thu an tarlang.

Denmark Prime Minister Helle Tharnong-Schmidt chuan he pawikhawihna hi firfiakte thiltih a nih thu sawiin, he thila inhnamhnawihte chu zawnchhuah ngei an nih tur thu a sawi.