IS firfiakte'n Egypt Kristian 21 lu an tansak

Islamic State (IS) firfiak pawl chuan video tichhuak thar lehin, an video-ah hian Libya ram tuipui kama Egypt Coptic Kristian mi 21 lu an tansak lai tihlan a ni.

IS video thar hi an pawl Twitter-ah dahchhuah a ni a, minute nga awh a ni. Video thupuiah, 'A Message Signed With Blood to the Nation of the Cross' tih vuah a ni.

Kristian an tihhlumte hi a hmaa an tihhlumte ang bawkin jump suit serthlum rawng haktir vek an ni a, leiah ṭhingthit tir an ni. An hnungah firfiakte hi hmaituam chungin an lang bawk a, thah an nih ma hian firfiak zinga pakhat chuan chem kengin, 'Kristian sipaite himna in beisei chu in duhthusam mai a ni' tiin a sawi.

Mi 21 an tihhlumte hi central Egypt-a hnathawka awmte an ni a, nikum December thla tawp lam leh kumin January thla tir lama man an ni.

Video-a Kristiante tihhlumtu zinga ṭawngchhuak ber hi video an tih­chhuah hmasaka an mi mante tihhlumtu kha a ni lo nia hriat a ni. A ṭawngkau chheh a dang a, British accent a hman loh bakah a veikhawr bawk. Kristiante chu lu tansak chhunzawm zel an tum thu an sawi bawk.

Al-Qaida pawl hotu, Osama bin Laden-a ruang tuifinriat mawng­a phum nia report chungchang sawilangin, IS firfiakte chuan tuifinriat tuite chu Kristiante thisena pawlh vekah an vau bawk.

"Rome chhim lama Islam ram, Libya-ah kan awm mek a, kan theihtawpin kan bei zel dawn che u, Isua a tlawm a, kraws tihchhiat a nih hma chuan. Vawkte pawh kan that zel dawn a, Muslim ni lo pawmna dante khap vek a nih hma chuan indona hi kan kalpui ang. Tuifinriata Osama bin Laden-a ruang in thuhrukna chu in thisenin kan pawlh vek dawn a ni," tiin video-ah hian vauna thu an sawi.

Firfiakte chetdan rawng tak hi US chuan a dem thu a sawi nghal a, White House chuan thuchhuah siamin, "Libya rama IS firfiakte'n Egypt mi 21 an thah dan hi mi dawihzep thiltih leh tenawm a ni. Hetianga rawng taka chetna hian Libya ram tualchhung buaina chinfel thuai a ngaihzia a tilang a, Libya ram buaina hi firfiakte hian hlawkpuina atan an lo hmang a ni," a ti.

Kum 2011-a Colonel Muammar Gaddafi paihthlak a nih aṭang khan Libya tualchhung dinhmun hian ngai a la awh thei lo a, Islamist pawl hrang hrangte chu thuneitu nih inchuhin an intibuai reng a ni.

Egypt President Abdel-Fattah al-Sissi chuan Egypt mite chunga firfiakte chetdan rawng tak chu a dem takzet tih sawiin, na taka an chhan let tur thu a sawi. IS video tihchhuah a nih hnua national television-in a kawmnaah, President Sissi chuan Egypt chuan rawng taka an mite thattute chunga phuba lak dan tur leh a lak hun tur chu a thlang fel thuai dawn a ni tiin, an ram sipai hotute pawh hemi chungchang hi a sawipui nghal bawk. Egypt chuan firfiak kuta an mi 21 thi te sunna hi ni 7 chhung hman a tum.