Israel PM-in Europe Juda-te Israel-a pêm turin a duh
Tun hnaia France leh Denmark-a Juda mite'n beihna an tawh hnuah, Israel Prime Minister Benjamin Netanyahu chuan Europe rama Juda-te chu Israel-a pêm tura a duh thu a sawi.
Netanyahu chuan, "Europe leilungah Juda-te thah an ni leh a, thah an nih chhan hi engmah dang niloin Juda an nih vang chauh a ni. Khawvel ram tinah Juda-te hian venhimna dawn an phu a ni. Hemi rual hian Juda-te hnenah Israel hi in inpui a ni tih kan hrilh duh a ni," a ti.
Denmark-a chief rabbi, Jair Melchior chuan PM sawmna siam dan hian a tilawm vak lo tih a sawi a, hemi rual hian, "Denmark rama Juda-te Israel-a pêmlut an awmchhan chu Israel an hmangaih a, Juda mi an nih vangte a ni a, firfiakte hlauh vang a ni lo," tiin a sawi.
Denmark Prime Minister Helle Throning-Schmidt pawhin Juda hnamte chuan Denmark society-ah hmun pawimawh tak an chang a ni, a ti bawk.
Nikum khan France aṭangin Juda sakhaw vuantu mi 7,000 chuang chu Israel-ah an pêm a, hei hi a kum hmasa aiin a letin a tam. France President Francois Hollande chuan thla hmasaa thu a sawiah, Juda-te tan France chu thlamuang taka an awmna tur a ni, a ti.