Eirua puh vangin Iran vice president hlui a tang

Iran vice president hlui, Mohammad Reza Rahimi chu eiru-a puh a nih avang­in kum nga chhung tantir tura thiam loh chantir a nih hnuin Pathianni khan Terhan hmarlama Evin tan-inah dah a ni.

Iran Supreme Court chuan January thla khan Rahimi hi kum nga leh ni 91 tang turin thiam loh a lo chantir tawh a ni.

Rahimi hi President hlui Mahmoud Ahmadinejad hnuaia vice president hmasa ber a ni a, a eiruk vang hian kum nga tang tura hrem a nih bakah an ram pawisa, Rial tluklehdingawn 10 (dollar 364,000) chawi tur leh, bungrua Rial tluklehdingawn 8.5 hu pe kir leh tura hriattir a ni bawk.

Vice president hlui hi Iran Insurance Company tichingpenah puh a ni a, thubuai siamsakin kum 15 tang tura hrem a ni. Mahse Rahimi hian Court of Appeal-ah a thlen a, vawi hnih a appeal hnuah ngaihtuah ṭhat niin, Supreme Court-ah thawn a ni a, kum nga leh ni 91 tang tura tihnep sak a ni.