Venezuela-ah President Maduro duh lotuten nawrh huaihawt

Venezuela President thlana neih zawh takah President ṭanglai, socialist Nicolas Maduro chu a term thumna atan thlan tlin a ni leh a, mahse eptute chuan inthlan result hi pawm loin nawrh an huaihawt a, police-te nen an innawr buai nasa hle.

National Electoral Council (NEC) chuan inthlanah hian Maduro hian vote tla aṭangin 51% a hmu niin sawi mah se, ram puma vote tlak dan chipchiar takin a tarlang tel lo. Eptute chuan NEC hi Maduro kaihhruai sorkar thununna hnuaia awm a ni tiin, Maduro chaka a puang chu an pawm lo tih an sawi. Inthlanah hian eptu pawl candidate, Edmundo Gonzalez chuan vote tla aṭangin 73% hmuin a tling zawk a ni, an ti. Inthlan hmaa mipui ngaihdan lakah pawh khan Gonzalez hian a hmu sang zawk hle a ni. Eptute chuan Maduro sorkar chu an ning tawh a, inthlak danglam a, Venezuela ram zalen tak neih an duh tawh tih sawiin, an ram khawpui Caracas lailiah mi sang tel an pungkhawm a ni. Pungkhawmte hian Presidential palace lam pan an tum a, police-ten lo dangin an innawr buai zui a ni. Khawlaiah motor ke-te hal a ni bawk a, police lam chuan mipui hnawh darh nan hian tear gas-te an hmang a ni.

Buaina chhuak vang hian Venezuela sorkar pawhin commercial air flight-te chu vawiin aṭangin tihtawp lailawk a ni dawn tih a puang a ni. President Maduro chuan eptute chu inthlan result sawi buaia, sorkar paihthlak tumah a puh a, hemi rual hian hetianga beihna leh harsatna hi an tawn vawi khatna a ni lo, a ti.

Khawthlang lam leh Latin America-a ram hrang hrang bakah, UN chuan Venezuela thuneitute chu inthlan result chipchiar, polling station hrang hranga vote tlak dante tarlang turin an ngen. Ram dangte hian Venezuela Preisdent thar thlanna result hi an pawmpui thu an la sawi hlawm lo. Organization of American States (OAS) chuan inthlan result chungchang ngaihtuahin vawiin hian meeting an nei dawn bawk.