Ukraine, Gaza leh Myanmar-ahte indona a tawp a ngai : Quad

Quad hnuaia thawk ho ram pali- Australia, India, Japan leh United States foreign minister-te chu Tokyo-ah inhmukhawmin Ukraine, Gaza leh Myanmar-a indonate chu tih tawp a ngai tiin thuchhuah an siam.

Tokyo, Japan-ah Quad FM-te hi Thawhṭanni khan inhmukhawmin Middle East-a remna leh muanna a awm chu an duh tih an tarlang. Thuchhuah inṭawm an siamah October 7, 2023 a Hamas in Israel an beih chu an dem tih an sawi a, hetih rual hian Gaza-a civil mi tam tak thihna leh mipuite tawrhna thleng mek chu pawm theih a ni lo tih an tarlang bawk. Gaza mipuite tan chhawmdawlna tam zawk rang taka thawn luh a ngai tiin, Middle East-a buaina a ṭaidarh loh nan hmalak a ngai tih an tarlang.

Quad ram FM-te hian Russia-Ukraine indona thleng mek chu ngaihven a ngai hle tih an tarlang bawk. Ukraine tan a zalenna leh a ram a hloh loh a pawimawh a, indona a tawp theih nan inremna tluantling UN charter zulzuiin siam a ngai a ni, an ti. Myanmar a buaina thleng mek chungchang pawh sawilangin, hnam hrang ralthuam chelek pawl leh sipai sorkar inkara inbeihna thleng chuan Myanmar ram ṭhenawmte a nghawng tih an sawi. Myanmar ram ṭhenawmah cyber crime, mihring hmanga sumdawnna leh ruihhlo tawlhruk a hluar phah a ni, an ti. Quad Foreign Ministers thuchhuah inṭawm siam chuan tualchhung buaina tihtawp chu an duh thu sawiin, Israel-Hamas buaina a reh theihna atan mi tang chhuah zalen leh chhawmdawlna ṭha taka luhtir ni se an duh tih an tarlang bawk.

China-in Quad a dem

Quad hnuaia ram thawk hote hian Indo-Pacific tuipuia zalen taka inkalpawh theihna chu humhim turin ṭan an la dawn tih an tarlang a, ram chak zawkin ram te zawk laka hleihlenna a lantir loh nan an bei zel dawn tih an sawi. Quad ramte hian China sawi lang lo mah se East China Sea leh South China Sea a thil thlengah an beng an chhi reng tih an tarlang a, he tuipuia ram inchuhna thleng mekah hian tharum hmang emaw tihluihna hmanga emawa inremna awm sa mahni thua tih danglam a nih chuan an pawm thei dawn lo tih an tarlang.

China chuan East leh South China Sea chungchanga Quad thuchhuah hi chhang letin, China foreign ministry thupuangtu, Lin Jian chuan an ram zahawmna leh tuipui ram chin humhim chu an duh ber a ni a, an buaina neih pawh inbiakna hmangin chinfel an tum tih a sawi. Lin chuan Quad chu, "Boruak ṭha lo siam chawptu, buaina chawh chhuah tum leh ram dangte hmasawnna ti ṭhuanawptu" tiin a puh a ni. Quad ramte chu innghirnghona chawk chhuak zawnga khawsa lo tur leh buaina awmsa tipunlun zawnga che lo turin an duh tih a sawi bawk.