Bangladesh : Tualchhunga buaina chhuaka thite rampum huapin sûn

Bangladesh sorkarin hna laknaa zalenna sualtu chhungte tana 30% hauhsak a tum avanga ramchhunga buaina chhuaka thi zat chu 150 an tling tih sorkarin a tarlang. Sorkar chuan nunna chante sûnna hun nimin khan a hmang.

A ṭum khatna atan tualchhung buaina chhuaka thi zat hi sorkar chuan a tarlang a, ramchhung hmun hrang hranga thi zat chu 150 an ni, a ti. Cabinet secretary, Mahbub Hossain chuan buaina vanga nunna chante sûn nan hian mipuite chu badge dum bel turin a ngen a ni. Sakhaw hrang hrang biak-inah mitthi te leh hliam tuarte tan ṭawngṭaina hun hmang turin mipuite chu a ngen bawk.

Bangladesh Supreme Court chuan sorkar hna laka quota siam dan chu hnawlin, 93% chu hauhsak bik awm loin a tiṭha te chanpual tur a ni, a ti. Zirlai pawl hruaitu paruk chuan khawlaia nawrh an huaihawt hi SC thupekin an duh a tipuitlin avangin an tawpsan dawn tih an sawi. Mahse ramchhungah boruak a la dai thei lo thung a, zirlai ṭhenkhat chuan an hruaitute hi police-in tihluihna hmangin nawrh huaihawt an tihtawptir nia sawiin lungawi lohna a thara lantir an tum tih an sawi. Hei vang hian sipaite chuan Dhaka-ah venhimna khauh takin an la kalpui chhunzawm zel a ni.

Buaina chhuak vang hian ramchhung hmun hrang hrangah tharum thawhna thlengin mi tam tak an thih bakah, mipui leh police eng emaw zatin hliam an tuar a, sorkar hmunhmate tihchhiat a ni bawk. Bangladesh sorkar chuan ni 10 chhung internet service a titawp a, boruak a ziaawm hnuah internet hi a tinung leh chauh a ni. Foreign Investors Chamber of Commerce and Industries (FICCI) chuan tualchhunga buaina chhuak hi ramchhung sum leh pai dinhmun pawhin a tuar hle tih tarlangin, buaina chhuak avang hian Bangladesh chuan USD tld 10 hû a hloh a ni, an ti.