IS-te'n Iraq-ah mi 40 chuang an hal hlum

Islamic State (IS) firfiakte chuan Thawhlehni khan Iraq khawthlang lam, Anbar province-ah mi 40 chuang an hal hlum.

Police hotu Colonel Qasim al-Obeidi chuan al-Baghdadi khuaah mi 30-45 inkar halhlum an ni, a ti a, heng mite hi albu-Obeid Sunni hnam an ni. An zingah hian sorkar thlawptu, Sahwa paramilitary group member leh police-te pawh an tel.

Firfiakte mi halhlumna khua hi Iraq rama US airbase, Ain al-Assad aṭangin a hla lo a, he airbase-ah hian US sipai 300 chuang an awm a ni. Kar kalta Ningani aṭang khan al-Bahgdadi khaw bulah hian IS firfiak leh Iraq sipaite an inbei tawh a, firfiakte hian he khua hi lak an tum a ni.

US airbase pawh an bei a, mahse security force leh US thlawhtheihna hmangin an nawr kiang thei a, khaw chhunga hmun an lak tam zawk pawh Iraq sipaite hian an la let leh tawh bawk.

IS group hian Iraq rama province lian ber, Anbar province-a 80% vel chu an thu hnuaiah an dah tawh a, Iraq khawpui Baghdad pawh lak an tum a ni. Mahse security force leh Shia sipaite'n an lo beih let avangin firfiakte hi an hnungtawlh leh a ni.

Firfiakte hian Pathianni khan Libya ram tuipui kama Egypt Coptic Kristian 21 te lu an tansakna video chu an lo tichhuak tawh bawk. Egypt President Abdul Fattah al-Sisi chuan rawng taka an mite thattu, IS firfiakte lakah phuba lak ngei a tiam. Egypt sipaite pawhin thuchhuah siamin, "Egypt mite thisen chhuak phuba lak leh tualthattute beih let hi kan tih tur, kan duty a ni," an ti. President Sisi thupek angin Libya rama Egypt mite chu lakchhuah mek an ni bawk. Egypt sorkar chuan Kristian thite sunna hun hi rampumah kar khat chhung hman a tum thu a puang.