Myanmar-a Kokang bialah martial law puan a ni

Myanmar ram Kokang bialah helho leh sipaite an inbeih chhunzawm reng vangin sorkar chuan sipai hnena thuneihna sang pein, martial law a puang.

President Thein Sein chuan Kokang biala thuneihna chu sipai kutah a dah a, he dan hi thla thum chhung hman a ni ang.

Myanmar ram aṭanga tlanchhia, Kokang helpawl hotu Phone Kya Shin chu kum nga hnuah a let leh a, a kir hnu hian an pawl Myanmar National Democratic Alliance Army (MNDAA) chu intuaithar lehin sipaite nen hian an inbei leh ta a ni.

Hel leh sipaite inbeihna avang hian Myanmar mi 30,000 chuang chu ramri kanin China ramah an tlanchhe tawh. February 9 aṭang khan inbeihnaah hian sipai 50 chuang an thi tawh a, hel 29 an thi tawh bawk.

Kokang hi Han Chinese thlah an ni a, MNDAA hi Kokang bial tana thuneihna sang pek phutin sorkar lakah an hel a ni. Kum nga kalta khan MNDAA hotu, ruihhlo tawlh­ruknaa inhnamhnawih ṭhin Phone Kya Shin hi China ramah a tlanchhia a, mahse Kokang bialah hian nikum kumtawp lam khan a kir leh a, sorkar lak aṭanga thuneihna chhuahsak tumin a bei leh a ni.

Sorkar official-te chuan emegency puan anih chhan chu bial chhung boruak siamṭhat a, ngai a awh leh theihna tur a ni tih sawiin, martial law chu boruak muanawm a awm leh theihna tura puan a ni, an ti.