Boko Haram-te'n Nigeria inthlan tihbuai an tum

Nigeria helpawl, Boko Haram chuan March 28-a an ram President thlanna neih tur chu tihbuai an tum.

Helpawl hruiatu, Abubakr Shekau chuan an pawlin video an tih­chhuah tharah, President thlanna hi boruak muanawm tak hnuaiah an nei thei dawn lo tih a sawi. He video hi Thawhlehni khan social media-ah tihlan a ni a, hetah hian Shekau chuan sorkar hi vauin, inthlan neih tur hi tharum leh thisen chhuahnain a tibuai dawn a ni, a ti.

Shekau chuan, "Allah hian in­thlan neih hi a phal dawn lo a, Allah chauh hi roreltu leh thuneitu a ni a, he ramah pawh hian a rorelna hi hman a ni ang," a ti. Inthlan nei tura an inbuatsaihnaah, Boko Haram member-te nunnain tuar dawn mah se boruak ṭha tak hnuaiah neihtir an tum dawn lo tih a sawi.

Nigeria President thlanna hi February 14 khan neih tura ruahman a ni a, mahse security lam venthawnna avangin March 28 ah sawn a ni.

Thawhlehni khan Cameroon khawpui, Yaounde-ah Central Africa ram hruaitute chu inhmukhawm­in, Boko Haram-te bei lettu tur ṭang­rual sipai siam dan turte an ngaihtuah. Member ram 10-te chuan helpawl beihletna atana sum mamawh, dollar maktaduai 100 aṭang­in a zahve chu an thawhkhawm tawh niin an sawi bawk.