Thailand PM hlui lakah criminal case thehlut

Thailand attorney general chuan nimin khan an ram Prime Minister hlui Yingluck Shinawatra chu thuneihna a chan laia rice subsidy scheme a kalpui dan chungchangah a lakah criminal case a thehlut. He thubuaiah hian thiam loh chantir a nih chuan PM hlui hi kum sawm lung-in tantir theih a ni ang.

Prosecutor-te chuan Supreme Court-ah case document-te an theh­lut tawh a, Yingluck-i chu politics lama a dinhmun sawh­nghehna atan sorkarin dollar tluklehdingawn tel a hlohna rice subsidy scheme kalpuiah puh a ni.

Thla khat liamtaah khan legislature chuan he scheme vang bawk hian PM hlui hi thiam loh a lo chantir tawh bawk a, kum nga chhung politics khel thei lo tura hrem a ni.

Kum 2014 May thla khan court chuan Yingluck-i hi PM a nihna aṭangin a paihthla a, a hnu reiloteah sipai thuneihna hmangin a kaihhruai sorkar chu paihthlak a ni a, tun thlengin Thailand hi sipai rorelna a awm zui ta rih a ni.

Yingluck-i PM laia rice subsidy scheme a siamah hian sorkar chuan Thai loneitute hnen aṭangin market rate aia sang daihin buhfai a leisak a, hei vang hian sorkarin sum tam tam a hloh. Thailand thingtlanga loneitute hi Shinawatra chhungkua thlawptu pawimawh tak an ni. Yingluck-i chuan he subsidy scheme hi loneitute ṭanpuina atana a ruahman niin sawi mah se, sawiseltu lam chuan amah thlawptute tana sum semna remchangah a hmang tiin an puh thung.

Supreme Court-a criminal case thehluh hi pawm a nih dawn leh dawn loh chu March 19 hian tihfel a ni ang.

Finance Minister Somnai Phasee chuan national corruption watchdog hnena aṭanga lehkha a dawnah, Yingluck-i'n scheme a kalpui vanga sorkarin Thailand pawisa, baht tluklehdingawn 600 (dollar tluklehdingwn 18.4) a hloh rulhletna atan a laka thubuai thehlut tura hriattir a nih tih a sawi bawk.