Prosecutor thihdana lungawi lohna lantir

Argentina mipuite chuan an ram president thiltih dik loh puanzar tumtu, prosecutor Alberto Nisman mak taka a thih danah an lungawi lohna lantirin Nilaini khan an ram khawpuiahah kawng an zawh. Kawngzawhnaah hian mi 400,000 chuang an tel nia sawi a ni.

Kawngzawhte chuan an ram flag kengin, rorelna dik leh thu dik hriat an duh thu ziahna lehkha an keng tel bawk. Prosecutor Nisman thih danah chuan thil dik lo a awm ngei nia sawiin, mipuite chuan President chungchang chhuitu a thih ringawt dan te, a thih chhan tumahin an hre lote chu thil rinhlelh­awm tak a ni, an ti.

Alberto Nisman hian kum 1994-a Buenos Aires-a Jewish community centre bomb a nih ṭum, mi 85 an thihphahna mawhphurtute thup turin President Christina Fernandez leh official pawimawh dangte'n Iran official-te a rukin inremna an siampui niin a sawi. President diklohna finfiahna a neihte chu Congress hmaah puanzar a tum thu a sawi hnuah, January 18 khan a bathroom chhungah thia chhar a ni a, a bekah silaia kah a ni.