US-in armed drone a hralhchhuak dawn

US chuan a ṭhianṭha leh thawhpui ram ṭhenkhat hnenah armed drone hralhchhuah a remti dawn tih a sawi.

US chuan armed drone hi UK hnenah chauh hralh­chhuah a phal ṭhin a, ramdangte hnenah chuan unarmed craft a hralh thin.

Ruahmanna thar a siamah, US chuan ram dang hnenah pawh armed drone hi a hralh tawh dawn tih a sawi a, mahse intiam kamna fel tak nen chauh hralh phal a ni ang, a ti. Armed drone lei turte chuan military campaign-na atan chauh an hmang ang tia inremsiamna an ziah a ngai dawn a, hei bakah han US chuan an hman dan pawh a thlithlai zui bawk ang.

State department chuan armed drone a hralhna tur ramte hi a sawilang lo a, mahse an zingah hian Italy leh Turkey chu an tel nia sawi a ni. UAE hnena unarmed Predator drone hralh tur chungchang pawh ngaihtuah mek a ni bawk.

Armed drone hi US-in fir­fiakte a beihna kawngah a hmang ṭangkai hle a, al-Qaida leh firfiak pawl dang tam tak beihna atan a hmang tawh a ni a, hemi rual hian drone hmanga beihna avang hian civil mi tam takin an thihphah nia sawi a ni bawk.