Venezuela President paihthlak tuma puh eptu hruaitu man a ni

Venezuela intelligence agent-te chuan Ningani khan eptu hruaitu, Caracas Mayor Antonio Ladezma chu President Nicolas Maduro paihthlak tuma hmalaknaah inhnamhnawiha puhin an man.

Intelligence agent-te hian Antonio Ladezma hi a office-a a awmlai chu a kawngkhar tihchhiatsakin an luhkhung a, an man a ni. Eptu legislator Ismael Garcia chuan Ladezma man a nih dan chu sawiselin, "Manna tur lehkha pawh an keng lo a, a office kawngkhar tichhiain ui ang maiin an hruai chhuak a ni," a ti.

Nikum khan President Nicolas Maduro ban phutin eptute chuan nawrh an lo huaihawt tawh a, an nawrhnaa tharum thawhna thlengah mi 43 an thi.

President Maduro chuan Ladezma hi President paihthlak tuma sorkar phiarruknaa a tel avanga man a nih thu leh, an rama tharum thawhna rapthlak tak thlennaah pawh a phen aṭanga lo fuihpawrhtu a ni, a ti.

Ladezma man a nih tih an hriat hian amah thlawptu mi tam tak chu intelligence service police headquarters kawtah pungkhawmin, chhuah nghal turin an phut.

President Maduro hian eptu hruaitute chu amah paihthlak tuma phiarruah a puh fo a, mahse a finfiahna erawh a nei lo. Nikum chhung khan eptu pawl hruaitu eng emaw zat chu jail-ah khung an ni a, an zingah hian nikuma nawrh huaihawtnaa a bultumtu, Leopoldo Lopez leh San Cristobal mayor hlui Daniel Ceballos te pawh an tel.