Myanmar-in China puihna a dil

Myanmar chuan China nena an inri-na bul aṭanga helhoin an ram a beih tur venna kawnga puih turin China a sawm.

Myanmar hmar­chhak lam, China ramri bula Kokang bialah sipai leh National Democratic Alliance Army (MNDAA) helpawl an la inbei chhunzawm reng a, he bialah hian martial law puan a ni.

Sipai hotute chuan rampawn lam aṭangin helho puitu an awm tih an sawi. Mahse China sorkar chuan helho hi a ṭanpui loh thu a sawi a, boruak ṭha tak hnuaia an buaina chingfel turin a ngen.

Ningani khan Myanmar President Thein Sein office-a official, Hmuu Zaw chuan Facebook-ah thuchhuah siamin, ramri kaltlanga inbeihna a thlen lohna turin China nena thawhdun a pawimawh thu a tarlang. Mahse a thuchhuah hi China lam chuan an la chhang lo.

Kokang bial tan thuneihna sang zawk pek phuta hel, MNDAA leh sorkar sipaite hi kumin February 9 aṭang khan an la inbei chhunzawm reng a, an inbeihnaah sipai 50 leh hel 26 an thi tawh a, mi tam tak hmun him lamah an tlanchhe tawh bawk.