Syria helte thuamchak nan Turkey leh US an inrem
Turkey Foreign Minister Mevlut Cavusoglu chuan Islamic State (IS) firfiakte bei tur, Syria opposition fighter-te training-na leh thuamchakna turin Turkey leh US chuan inremna an ziak tih a sawi.
Ningani khan inremna, memorandum of understanding hi US ambassador John Bass leh Turkey Foreign Ministry Under-secretary Feridun Sinirlioglu te'n Turkey khawpui, Ankara-ah an ziak a ni.
Sinirlioglu chuan inremna an ziah chu a bul ṭanna chauh a ni tih sawiin, tih tur hmabak tam tak an nei, a ti. Khawvel hmun hrang hrangah buaina a awm a, heng buainate tihreh turin thawhho ṭhat a ngai a ni, a ti.
Inremna hi March thla aṭangin hman ṭan a ni dawn a, kum thum chhung Syria opposition fighter 15,000 te chu training pek an ni a, an zinga 5,000 chu Turkey rama Kirshir-a sipai hmunpuiah training pek an ni ang. US chuan he inremna hi Syria President, Bashir al-Assad-a kaihhruai sorkar tan a hlauhthawnawm lo a, IS te chu ngaih pawimawh hmasak a ngai tih a sawi.
US military official-te chuan IS kut aṭanga Iraq rama Mosul khua laklet dan tur an duang a, April-May chhungin he khawpui hi lakkir hman an tum. Mosul khaw lakir tura beihnaah hian Iraq Army brigade panga hman an ni dawn a, sipai 25,000 velin an bei dawn a ni. Anni bakah hian Kurdish Peshmerga fighter brigate pathumin an pui bawk ang.
Iraq khawpui lian pahnihna, Mosul khua hi nikum June thla aṭang khan IS kutah a awm a, khawpui hi firfiak 1,000-2,000 velin an awmchilh reng nia sawi a ni.