
Hamas hotupa Ismail Haniyeh thah a ni
Palestinian firfiak pawl, Hamas chuan an political leader, Ismail Haniyeh chu Iran-ah thah a ni tih nimin khan an puang. Haniyeh hi Thawhlehnia Iran president Masoud Pezeshkian lakluhnaah telin, a chenna in lama a kir hnuah Israel chuan an kap hlum ta niin an sawi.
"Kan unaupa, hotupa, pasalṭha Ismail Haniyeh, kan movement hotu chu president thar lakluhnaa a tel hnuah, Tehran-a a chenna hmunah Zionist te beihna vangin a thi a ni," tiin Hamas chuan thuchhuah an siam. Iran Revolutionary Guards pawhin Hamas hotupa thih thu hi an puang ve bawk a, Tehran-a a chenna hmun chu beih niin Haniyeh leh amah vengtu pakhat an thi tih an tarlang.
Kum 62 mi, Ismail Haniyeh hi kum 2017 khan Hamas political bureau hotupa atana thlan niin Khaled Meshaal a thlak a ni. Palestine ram politics a hnuhma nei lian tak niin kum 2006 khan prime minister hna a lo chelh tawh bawk. Haniyeh hi Palestine-ah cheng loin Turkey leh Qatar-ahte a biru ṭhin a, 2019 aṭangin Qatar-ah a khawsa a ni. Palestinian pawl hrang hrangte chu inlaichinna ṭha a neihpui thei a, heng zingah hian Hamas hmelma pawh an tel a ni. Kum 2018 khan US Department of State chuan Haniyeh hi firfiakah a puang a ni. Haniyeh fapa pathum Hazem, Amir leh Mohammad te chu April 10 khan Israel beihna vangin an thi a, hemi ṭum hian a tu pahnih a chan tel bawk.
Israel minister of heritage, Amichai Eliyahu chuan Hamas hotupa thah a ni chu khawvel bawlhhlawh thenfai dan tur dik tak a ni, a ti. "Hetianga kan chet hian remna kan nei thei ang a, remna duhte nena kan chen ho theih nan kawngka a inhawng zau sawt dawn a ni" a ti. Eliyahu chuan Haniyeh thihna avang hian khawvel chu a hma aiin tlemin a ṭha deuh a niin a sawi. Israel hian October 7, 2023-a Hamas ten Israel an beih avang khan Ismail Haniyeh hi thah a, Hamas pawl chu nuai chimih vek a lo tiam tawh a ni.
Israel chuan Haniyeh thah a nih hma lawk hian Beirut-a building pakhat an beihnaah Hezbollah military commander, Fuad Shukr an that niin a sawi. Hezbollah lam chuan a hotu thih thu hi an la puang lo a, mahse Israel-in a beih building-ah hian a awm ngei niin an sawi. Shukr hi Hezbollah commander senior ber niin, kar liam ta kartawp lama Hezbollah-ten Golan Height an beih a, Israel mi 10 chuang thihnaah khan mawphurhtu berah Israel chuan a ngai a ni. Hamas leh Hezbollah hotute thah an nih hnuah hian Israel prime minister, Benjamin Netanyahu chuan security cabinet meeting a ko nghal bawk.
Hamas leh Iran-in phuba lak tiam

Hamas lamṭang khawvel ram dang bakah Hezbollah leh Houthi helpawlte chuan Haniyeh thah a ni chu an dem thu an tarlang. Qatar, Turkey, Malaysia, Russia leh Iran ram hruaitute chuan Haniyeh thihna chungchangah hian thuchhuah an siam ve bawk. Russia deputy foreign minister Mikhail Bogdanov chuan Haniyeh thihna chu politics vanga inthahna a ni tiin pawm theih a ni lo a ti a, he thil thleng hian boruak ṭha lo zawk a thlen dawn niin a sawi.
An hotupa thihna hi an ngawihsan mai dawn lo tih Hamas chuan sawiin, an chhang let ngei dawn a ni, an ti. Hamas political bureau member Musa Abu Marzuk chuan Ismael Haniyeh thah a nih dan chu mi dawihzep thiltih a ni tiin, chhan lohin a awm lo ang, a ti.
Iran ram hotu lu ber, Ayatollah Ali Khamenei pawhin Iran chuan Haniyeh thisen phuba a lak a ngai a ni tiin, Israel chu hremna pek a tiam, hremna na tak dawng turin lo inbuatsaih rawh u, tiin Israel a vau. Iran foreign ministry chuan Haniyeh-a martarna chuan Iran, Palestine leh Israel dodaltute inzawmna a tih ngheh zual phah dawn a ni, tiin a sawi bawk.