Democrats aiawha ding thei awmchhun Kamala Harris

US vice president, Kamala Harris chuan US President thlanna neih turah party candidate ni turin Democrats party delegate-te thlawpna a hmu ṭha hle a, vawiin aṭanga an party aiawh thlanna neih turah party candidate nihna hi chuhpuitu an awm thei dawn lo niin a lang.

Democrats delegate 3,923 chuan Harris hi an party aiawha ding tura an duhna petition an thehlut a, hemi bakah hian delegate zinga 99% chuan Harris hi an thlawp tih Democratic Party chuan an tarlang bawk.

Democratic National Committee (DNC) Chair, Jaime Harrison leh Democratic National Convention Committee (DNCC) Chair, Minyon Moore chuan thuchhuah inṭawm siamin an party aiawha ding tura chuh thei turin delegate 300 thlawpna hmu candidate dang an awm lo tih an tarlang.

Kamala Harris hi president inthlan chuhtu tur a ni tih hi official-a puan a la ni loa, mahse vawiin aṭanga kar leh Thawhṭan thleng neih tur, Democratic party aiawh tur tihchianna virtual roll call-a vote theih tur hi Harris lo midang chhawp chhuah a ni thei dawn ta lo a ni. DNC leh DNCC chair-te chuan delegate-ten Harris an thlawp ṭha hle a, president inthlan chuh tur an thlannaah an party chuan lungrual takin hmalam an pan zel tih an sawi.