IS firfiakte'n an mi mante bawma khungin kawng zawhpui
Islamic State (IS) firfiak pawl chuan video tihchhuak thar lehin, hetah hian Kurdish fighter an man 21-te chu bawma khungin kawng an zawhpui lai tihlan a ni.
Video hi kar kalta kartawp lama tihchhuah a ni a, hei hi video-a Kurdish fighter an mante an tihlan ṭum hnihna a ni. Video-ah hian Kurdish fighter-te hi steel-a siam bawm chhungah khung an ni a, an khungna bawm hi car chungah dahin kawng zawhpui an ni. Hemi hmaa video an tihchhuahah Kurdish fighter 17-te chu Iraq-a Kirkuk khuaah kawng an lo zawhpui tawh bawk.
Firfiak pawlte'n video an tihchhuah thar ber hi minute 9-a rei a ni a, a thupuiah "Healing the Believers' Chest" tih an vuah. Kawng zawhpui an nih hnu hian an mi mante hi interview an neihpui leh a, hemi zawh hian bawm aṭanga la chhuakin leiah ṭhingṭhit tir an ni.
IS te hian an mi mante laka rawng taka an chetna video ṭhahnem tak an tichhuak tawh a, Egypt Kristian 21-te lu an tansak leh mi an halhlum lai video-te pawh an lo tichhuak tawh bawk. Hei bakah hian hmeichhia an mante chungah mipat hmeichhiatna lam hawiin rawng takin an che ṭhin nia sawi a ni bawk.
United Nations chuan IS firfiakte'n an mi hren an thahte taksa peng pawimawh chu lain an zuar ṭhin nia sawi chu a chhui chiang mek nia sawi a ni. UN-a Iraq palai, Mohammed Alhakim chuan firfiakte'n an thahte ruangah hian an taksa peng ṭhenkhat a bo ṭhin niin a sawi.