Australia-ah thlipui tleh vangin in 1,500 a chhia

Thlipui, Tropical Cylcone Marcia tleh vangin Australia-a Queensland state-ah chenna in 1,500 a chhia a, mi tam tak chu eng nei loin an awm mek bawk.

Official-te chuan kar kalta Zirtawpnia Australia hmarlama thlipui tleh tuarte chhanchhuah leh chhawmdawl hna hi nimin thleng khan ngawrh taka thawh chhunzawm zel a ni, an ti.

Marcia thlipui hi Queensland state-a Yeppoon khuain a tuar nasa ber a, chenna in bakah thil dang tam tak a tichhia a, power line pawh 1,800 vel a chhe bawk. Hei vang hian power hmukim tur chuan kar khat vel an nghah a ngai dawn a ni.

Sorkar chuan Yeppoon khuaa thlipuiin thil a tihchhiatte thenfai hna thawk turin sipai a tir a, anni bakah hian Queensland state chhung thlipui tuarte chhawmdawlna tur pek a ni bawk.