Maldive President hlui Mohamed Nasheed man a ni

Maldive President hlui, eptu hruaitu Mohamed Nasheed chu kum 2012-a senior judge manna tur thupek a tihchhuah avangin Pathianni khan anti-terrorism law tlawhchhana man a ni.

Criminal Court in manna tur thupek a tihchhuah angin kum 47 mi Nasheed hi Pathianni chawhnu dar 2.45 khan man a ni.

Maldive rama mipuite vote hmanga President atana thlan hmasak ber, Nasheed hian President a nih lai, kum 2012 khan Criminal Court Judge Abdulla Mohamed a mantir a, a thupek avanga mipuite'n lungawilohna nasa tak an lantir avangin hemi kum vek February-ah President a nihna aṭangin a bang. Judge Mohamed hi eirua puh a ni a, mahse man a nih hnu reiloteah chhuah leh nghal a ni.

Kum 2013 November thlaa Maldive President thlannaah khan Nasheed hian a chuh leh a, mahse President ṭanglai Yameen Abdul Gayyoom a hneh zo lo.

Maldive sorkar chuan President hlui hian senior judge mantirna tur hian a thuneihna piah lamah sipaite a hmang niin a sawi. Kar hmsa khan prosecutor-gene­ral chuan Nasheed-a laka crimi­nal charge a siam chu a sut a, mahse Pathianni khan terrorism kaihhnawihah thubuai hi siamsak lehin manna tur thupek tihchhuah a ni leh ta a ni.

Nasheed man a nih hnu hian a party, Maldivian Democratic Party (MDP) member eng emaw zat chu lungawi loin an pungkhawm a, mipui pungkhawmte hnawhdarh nan hian police-te chuan pepper spray an hmang.