Bangladesh-a lawng chesualah mi 65 an thi

Bangladesh tuipuia lawng chesual vanga thi chu nimin thleng khan mi 70 an tling tawh.

Pathianni chawhnu khan Bangladesh khawpui, Dhaka hmarthlang lam km 40 vela hla, Padma River-ah khualzin phur lawng, ML Mosta chu bungraw phur lawnglianin a su a, khualzin phur lawng hi a pil ta a ni. He vanduaina thlen lai hian lawngah hian mi 140 an chuang nia chhinchhiah a ni.

Lawng chesuala chuang zinga ruang 70 chu nimin zing khan hmuh an ni tawh a, midangte chu an chin hriat a nih loh avangin thi zat pawh hi an la punchhoh rin a ni. Nimin zing khan lawng pil pawh hi vaukam lamah lakchhuah a ni tawh bawk.

Chhanchhuah hna thawhnaa hotu, Inspector Zihad Mia chuan lawng chesuala chuang zingah chin hriat loha awm eng zat chiah nge tih leh, dama chhuak eng zat nge tih hriat chian theih a ni lo, a ti. Bangladesh-a khualzin phur lawngte hian passenger list an siam ang hi an zawm loin danin a phalsak aia tam an phur fo a ni.

Padma River hi Bangladesh rama lui lian ber zing a mi a ni a, nikum August thla khan he luiah hian lawng chesualin mi 100 chuang an lo thi tawh bawk. He lawng chesual hi khualzin 80 chin a phur phalsak a ni chungin a chetsual lai hian mi 200 vel an chuang a ni.