Ebola hlauh vangin NKorea-in marathon runner te luh a phallo

North Korea chuan kumin April thlaa an ram khawpui, Pyongyang-a international marathon neih turah, Ebola hri leng mek hlauh vangin ramdang mi intlansiaknaa tel tumte an rama luh a phal lo.

Ebola hri len hluarna, Africa khawthlang ramahte chuan he hri leng vang hian mi 9,000 chuang an thi tawh a ni. Hetihlai hian hri lenna ram aṭangin North Korea hi kilometre sang tela hla a ni a, mahse hetichung hian nikum October thla aṭang khan NKorea hian a ram chu Ebola hri a hlauh vang hian a khar a ni. An rama ramdang mi chhawmdawl hna thawktu leh diplomat-te pawh embassy compound-ah ni 21 chhung a dah hrang bawk.

Kum 1981 aṭang khan Pyongyang ah hian international marathon buatsaih a ni ṭhin a, mahse nikum chauh khan ramdang mite an tel phalsak a ni.

Koryo Tours director, Nick Bonner chuan NKorea-a an thawh­puite'n 2015 Pyong­yang Marathon-a tel tum, foreign runner te luh an remti dawn lo tih hi an hrilh niin a sawi. Mahse he khapna dan hi March thla tawp lamah an hlih leh theih a beisei thu a sawi nghal bawk.