Turkey sipaite Syria ram chhungah an lut

Turkey sipaite chu Syria ram hmarlamah lutin, kum zabi 13-naa thi, Suleyman Shah thlân chu an ramri hnaih lamah an sawn.

Turkey chuan he thlân awmna hi a ram chin niin a sawi. Nikum khan Islamic State (IS) firfiak chuan thlân hi beihah an lo vau tawh a ni.

Syria President Bashar al-Assad chuan an ram chhunga Turkey sipaite an lut chu a sawisel.Turkey hian Istanbul consulate hnenah thlân sawn an tum thu hi thlen mah se, Syria remtihna an nghak hman lo tih a sawi.

Suleyman Shah (1178-1236) hi Turkey lal ram, Ottoman empire dintu, Osman I pu a ni.

Turkey sipaite hian kar kalta Inrinni zan aṭang khan thlân lung sawn tur hian Syria-ah an lut a, Pathianni zing khan an zo a ni. He hna hi sipai 572 te'n an thawk tih Turkey Prime Minister Ahmet Davutoglu chuan a sawi.

Suleyman Shah thlân leh a ruhrote chu Turkey ramri hnaih, Esmesi khuaah sawn an ni a, he khua hi Turkey sipai enkawlna hnuaia awm a ni. Thlan tharah hian Turkey flag pawh zar nghal a ni.