IS hlauin Libya ramah Egypt mite an tlanchhia

Islamic State (IS) firfiakte'n Libya ram tuipui kamah Coptic Kristian 21-te lu an tansak hnuah, Egypt mi 15,000 vel chu Libya ṭhenawm ramah an tlanchhia.

Firfiakte'n Kristiante an thahna video an tih chhuah hnuah, kar kalta khan Egypt leh Libya indo thlawhtheihnate chuan Libya rama IS hmun pawimawhte an bei nghal.

Egypt sorkar chuan Libya rama Egypt mi hnathawka awmte chu Libya ram chhuahsan a, an rama kir turin a hrilh. Libya ṭhenawm, Tunisia rama tlanchhia zinga tam tak thlawhtheihna hmanga hruai haw an ni tawh bawk. Libya rama tlanchhe zingah hian Kristian eng zat nge awm tih erawh hriat a ni lo.

Tunisia Transport ministry thupuangtu chuan kar kalta Zirtawpni aṭang khan Libya ram aṭang an rama Egypt mi tlanlut zinga 1,000 chu Egypt sorkarin an ramah a hruai haw tawh tih a sawi. Egypt mi tam tak chu an rama luh tumin Libya nena an inri-na bulah an awm mek tih a sawi bawk.