Yemen President-in banna a thehluh sut leh

Yemen President Abd-Rabbu Mansour Hadi chuan banna a thehlut chu a sut leh a, nimin khan Aden khuaah senior security adviser leh provincial governor-te meeting a neihpui.

Hadi hi Houthi helhoin an ram khawpui, Sanaa-a a chenna-inah thla khat zet pawn chhuak thei loa an hren hnuin kar kalta Inrinni khan an chhuah a, Aden khaw lamah a kal nghal. Hel pawlte'n January thla khan sorkar thuneihna chu chhuhin, an nawrna avangin Hadi pawh hian President a nihna aṭanga banna a thehlut a ni.

Parliament member pakhat chuan Thawhṭanni khan Hadi hian assembly hnenah a banna thehluh a sutna lehkha a pe tih a sawi. Arab Gulf ramte chuan Hadi-a'n President dinhmun chelh let leh tuma a beihna chu an thlawp tih an sawi a, Yemen mipuite pawh a hmalakna hi thlawp turin an chah.

Thawhṭanni vek khan Shabwa province-a Bani Hilal hnam chuan Hadi an thlawpna lantirin kawng an zawh. Taiz khuaah mipui pungkhawmin Hadi chu Houthi helte umchhuak a, Sanaa khawpui chu a thuneihna hnuaiah dah leh turin an ngen bawk. Sanaa khawpuiah pawh Hadi thlawptu mi tam takin an thlawpna lantirin a in bulah kawng an zawh bawk.

Sanaa khawpui aṭanga a tlanchhuah hnuah, Hadi hian thuchhuah siamin Yemen President a la ni reng tih a sawi a, Houthi-te'n nikum September thla aṭanga Sanaa khawpui la a, sorkar thuneihna an chhuhsak dan chu dan kalh a ni, a ti.