New Zealand-in IS bei turin sipaite a tir dawn

New Zealand Prime Minister John Key chuan Islamic State (IS) fir­fiakte beihnaa Iraq sipaite ṭanpui turin an ram sipai 100 chuang chu Iraq ramah thawn luh an nih tur thu a sawi.

Parliament-ah hemi chungchang hi sawiin, PM Key chuan US kaihhruai ṭangrual sipaite'n firfiakte laka beihpui an thlaknaa tha an thawhna turin sipaite hi tirh an ni dawn tih a sawi. Sipai tirh tum chung­changah parliament-a vote lak a duh lo tih a sawi nghal bawk.

Key chuan New Zealand sipaite chu indona tualah an tel dawn lo a, Iraq security force-ten firfiakte an beihna kawngah ṭha zawka an inbuatsaih theihna atan training an pe ang, a ti.

IS-te hian Syria leh Iraq-ah ram zau tak an thunun mek a, middle east pum himna an tiderthawng hle. Firfiakte hian an mi mante chu rawng tak takin an tihhlum a, an tihhlum lai video-te pawh mipuite hmuh theih turin internet-ah an dah chhuak fo a ni.

Iraq sipaite pui tura New Zealand sipai tirhte hi Baghdad hmarlam, Taji Militray Complex-ah dah an ni dawn a, Australia nena thawkdunin Iraq sipaite training an pe ang.

Defence Minister Gerry Brownlee chuan training an pek tur hian a huam zau hle dawn tih a sawi a, individual and organizational military skill, basic weapon skill, individual and unit military skill bakah medical support leh logistics lamah training an pe dawn tih a sawi.