Israel beitu Palestinian pawlin dollar mtd 218 a chawi dawn

New York court chuan kum 10 chuang liamtaa Israel-a pawikhawihna thlengah Palestine Liberation Organization leh Palestinian Authority chu thiam loh a chantir a, dollar maktaduai 218 chawi turin a ti.

Kum 2002-2004 inkar khan Jerusalem leh a chhehvela pawikhawihna thlengah mi 33-in an thih phah a, mi ṭhahnem takin hliam an tuar bawk. Heng pawikhawihna thleng tuartute hnenah zângnadawmna pe turin Palestinian pawlte hi hriattir an ni.

Hetihlai hian Palestinian group-te hian court thutlukna chu an pawm loh thu leh, an appeal tur thu an sawi.

Jerusalem-a pawi­khawihna thleng tuartu zingah hian America mi an awm a, hei vang hian US court-ah thubuai hi thehluh a ni. Israel sorkar chuan thubuai thehluh chungchangah hian sorkar official inrawlh an awm lo tih a sawi lang bawk.

PLO leh Palestinian National Authority (PNA) chuan an puhnate hi thu dik lo a ni tih sawiin, court thutlukna siam dan chuan a ti lawm lo hle tih an sawi. Mahse kut tuartu chhungte chuan document hrang hrangah pawikhawihna thleng hi Palestinian thuneitute'n an remtihpui tih a lang tiin an sawi.