Kim Jong-un-a'n thlipui leh hri leng laka inveng turin chah

North Korea ram hotu, Kim Jong-un chu a hriselna dinhmun a ṭha lo hle a, report ṭhenkhatah phei chuan nikhaw hre loin a awm nia tarlan a nih laiin, Thawhlehni khan an party meeting-ah telpuiin thu a sawi. 

Kim hi a dam ṭha lo a, an ram inrelbawlnaa chanvo pawimawh pawh a farnu Kim Yo-jong hnenah a hlan ṭhen tawh nia sawi thawmte a awm a, mahse an state media-in Thawhlehnia meeting-a a thu sawi lai thlalak a tihchhuahah chuan a hrisel ṭhat hmel hle thung a, meizial a zu lai pawh tihlan a ni. 

NKorea hotu chuan an rama thlipui tleh tur leh hri lengin harsatna a thlen theih laka inveng tur leh, hemi kawnga a theih anga lo inbuatsaih turin hruaitute a chah. Tun kar tawp lamah NKorea hi thlipui, typhoon Bavi in a nuai dawn nia sawi a ni.