Nigeria-ah bomb puak vangin mi 16 an thi

Kawori, Nigeria-a kawngpui hrula thingpui dawr bulah bomb puak vangin mi 16 an thi a, hliam tuar eng emaw zat an awm bawk a ni. Bomb hi an ram huna Nilaini zan dar 8 a puak niin a tipuaktu hriat a la ni lo.

Bomb puahna hmun hi Borno state-a thingtlang khaw pakhat Kawori-ah niin state capital, Maiduguri aṭanga km 50 a hlaa awm a ni. Bomb hi improvised explosive device (IED) a ni tih hriat a ni tawh. Gwoza, Brono state-ah tunhnaiah thih chilh bomb ṭum thum tihpuah a ni tawh a ni. Kawori ami erawh thih chilh bomb a ni lo tih police-te chuan an sawi thung.

Brono State Emergency Management Agency chuan thi mi 16 bakah hian hliam na tak tuar mi 24 an awm tih an tarlang. State sorkar chuan bomb a puah hnu hian darkar 24 awh curfew a puang nghal bawk. Bomb tipuaktute hi hriat ni lo mah se kum 2009 aṭanga Nigeria laka hel, Boko Haram-te tih ngei a nih an ring thung. Boko Haram leh a hnuaia pawl dang, Islamic State West Africa Province (ISWAP) te chuan Nigeria leh a ṭhenawm ramah tharum thawhna thlen ṭhinin kum 15 chhungin mi 35,000 in an thih phah tawh bakah mi maktaduai 2.6 chuangin an chenna hmun an chhuahsan tawh bawk.