US leh Russia-in mi tang inthleng an zo

United States, Russia leh khawvel ram dangten December 2022-a mi tang 24 inthleng tura inremna an siam chu August 1, Ningani khan mi tang pathum chhuah leh niin zawh fel a ni ta.

Mi tangte hi Washington-a Air Force Base-ah ṭumin an chhungte bakah US president Joe Biden leh vice president Kamala Harris ten an lo hmuak a ni.

Russia hian Wall Street Journal reporter Evan Gershkovich, ex-marine Paul Whelan leh journalist Alsu Kurmasheva te an chhuah zalen a, mi tang inthlengna hi Turkey-ah neih a ni. Mi tang inthlen tura inremnaah hian Russia chuan American, Russian thlahte leh German mi tang 16 an chhuah zalen a, chutiang bawkin US, Germany, Norway, Slovenia leh Poland-a Russia mi tang pariat chu chhuah zalen an ni bawk. Heng zingah hian Russia tana enthlak hna thawktute pawh an tel a ni. US leh Russia inremna hi Soviet Union kehdarh hnua mi tang an inthleng tam ber ṭum a ni.

US president Joe Biden chuan US leilung ngeia American chhuah zalen takte a hmuak thei chu ropui a tih thu a sawi. Biden hian mi tang chhuah zalen takte leh an chhungte nen thla lain hun hlimawm tak an hmang ho a ni. Biden hian Germany leh Slovenia-te chu fakin, tang inthleng tawnnaah hian a hlawkna teltu ni dawn lo mah se ram dang an thawhpui thei chu a fak hle. Mi tang inthleng hian American dangte himna a tiderthawng nia sawi chu Biden chuan a pawm loh thu sawiin, hetiang hlauhna avang hian mi tang mekte chu jail-ah kan thih tir tur a ni lo, a ti. Tang inthleng tura inremna an nei thei chu ropui a tih thu Kamala Harris pawhin a sawi ve bawk a, "He inremna hian diplomacy hrethiam president neih a pawimawh zia a tilang a ni" a ti.