Polio hri lakah Africa a fihlim: WHO
World Health Organization (WHO) chuan Thawhlehni khan Africa chu Poliovirus (zeng hri) laka fihlim ramah a puang.
WHO chuan smallpox (zawnghri) ang maia Poliovirus hi mihringa natna thlen thei a nih thu a tarlang a, mahse Africa ramah chuan he hri hi nuaibo a ni ta tih a sawi. Kum 1996 aṭang khan Poliovirus hri leng tihziaawm a nih theih nan WHO chuan nasa takin hma a la a, Africa ramte chuan an thlawp ṭha hle bawk. Hemi kum hian Africa ramah hian Polio vei hi 70,000 aia tam an awm a ni. Hri hi nuaibo a nih tak avangin naupang maktaduai 1.8-in hri an kai tur ven theih a nih phah a, hei bakah hian naupang 1,80,000 nunna chhanhim a nih theih phah thu WHO chuan a tarlang.
Africa rama polio hri vei hmuhchhuah hnuhnung ber chu Nigeria-ah niin, kum 2016 khan a ni a, hemi hnu hian Africa ramah he hri vei thar hmuhchhuah a ni tawh lo. Kum li zet hri vei thar an awm loh hnuah WHO chuan Poliovirus laka fihlimah Afrcia khawmualpui chu a puang zui ta a ni. He hri hian naupang leh puitling zâng ruh natna a thlen theih avangin naupang lamah chuan an dam chhungin zang ruhna an neih phah thei a ni. Ram reitheiah he hri hi a darh duh hle a, hri danna vaccine hi kum 1950 vel khan hmuh chhuah a ni. Kum 1955 khan Inactivated poliovirus vaccine (IPV) chu Jonas Salk-an a rawn hmu chhuak ve leh a. A bikin Asia leh Africa ramahte he hri hi a hluar ṭhin hle.