Bangladesh : Nawrh huaihawtnaa buaina chhuak vangin mi 21 thi

Bangladesh tualchhung buaina chuan ziaawm lam a la pan thei lo a, prime minister Sheikh Hasina ban ngiatin mi tam tak an ram khawpui, Dhaka-ah an pungkhawm. Nawrh huaihawttute leh sorkar thlawptute inkarah buaina chhuakin mi 21 an thi a, mi 30 chuangin hliam an tuar bawk.

Sorkar hna lak chungchanga zalenna sualtu chhungte tana quota siam tumna dodalin July thla khan buaina a chhuak a, Bangladesh Supreme Court chuan hna lak chungchanga thuchhuah a siam vangin nawrh hi tihtawp lailawk a nih hnuah kar liam ta kar tawp lam aṭang khan sorkar paihthlak tumin nawrh hi thar thawh leh a ni. Dhaka-ah Inrinni khan kawng zawh huaihawt niin buaina liantham a chhuak lo a, mahse niminah nawrh huaihawt tute leh sorkarna siamtu, Awami League, Chhatra League leh Jubo League thlawptute inkarah buaina hi a chhuak a ni.

Bangladesh zirlai leh hnathawkte chu nawrh huaihawtnaah hian telin Prime Minister Hasina chu bang tura an duh a, quota duh lohna lantir laia nunna chante chungah rorelna dik pek ngei an duh tih an tarlang bawk. Dhaka hmun hrang hrangah zirlai leh hna thawk mekte hi pungkhawmin kawngpui an dang a, lirthei chevel a buai phah hle a ni. Bangabandhu Sheikh Mujib Medical University (BSMMU) ah chuan lirthei hal niin mipui pungkhawm zinga ṭhenkhat chuan hmanrua kengin mipui an rikrap nia tarlan a ni bawk. Nawrh huaihawt hmasak a nih khan sipaite chuan sorkar lam an ṭan a, tuna lungawi loh lantirna erawh an thlawp tawh thung.

Tualchhung buaina a chhuah hnuah Bangladesh sorkar chuan buaina punlun zel tur venna atan social media platform hrang hrang - Facebook, Instagram, TikTok, WhatsApp leh YouTube te a khap tawh a ni. Mobile data service pawh tihtawp a ni bawk.