Myanmar sipaiten Laukkai khua an bei, civil mi 10 an thi

Myanmar sipaite chuan China ramri bul, hnam bil pawlte thununna hnuaia awm, Laukkai khua thlawhtheihna hmangin kar liam ta Ningani zan khan an bei a, mi 10 an thi niin tualchhung media-te chuan an tarlang.

Laukkai khaw mite chuan Ningani zan rei tawh lamah sipaite hian thlawhtheihna hmangin ṭum hnih an bei a, civil mi 10 an thi tih an sawi. He khuaah hian mi 25,000 vel an cheng a ni.

Myanmar hmar lama Shan state-ah hian nikum June thla aṭang khan armed group leh sipaite hi an inbeih ngawrh hle. Myanmar National Democratic Alliance Army (MNDAA) chuan kumin January thla khan sipai 2,000 chuang an inpek hnuah Laukkai khua hi an thununna hnuaiah a awm tih an puang a ni. MNDAA lamin China hmalaknaa inkahhai thuthlung an siam palzut a, Shan state hmar lama beihpui an thlak leh avangin tun hnaiah sipaite hian Luakkai khua hi lak let tumin ṭum eng emaw zat thlawhtheihna hmangin an bei thar ve leh bawk.

MNDAA thupuangtu Li Jiawen chuan sipaite airstrike hian hospital pawh a fuh tel tih a sawi a, thi leh hliam an awm leh awm loh erawh a sawilang lo. MNDAA hian Laukkai khua an thunun hnuah, Shan state hmar lama awm Lashio khua chu sipaite kut aṭanga lak tumin an bei leh mek, kar liam ta khan MNDAA fighter-te chuan Lashio khua hi an lut a, sipaite nen an inbei mek nia sawi a ni.