Hamas hotupa thah a nih hnuah Middle East boruak a sang zual

Iran president thar lakluhnaa tel, Palestinian pawl Hamas hotupa Ismail Haniyeh thah a nih hnuah Hamas leh a thurualpuite chuan Israel chu beih let ve ngei an tum thu an sawi a, Middle East-ah hian indona lian zawk a chhuah mai a hlauhthawnawm hle.

Lebanon, Yemen, Iraq leh Syria rama Iran thurualpui helpawlte chuan Hamas an thlawp thu an sawi tawh a, Lebanon-a inkhuar Hezbollah chuan ramriah Israel hi an missile leh drone hmangin an bei reng bawk. Haniyeh thah a nih hnu hian Iran chuan Israel ram chhung hmun tam zawk kap turin Hezbollah chu a duh tih a hriattir a, sipai hmun chauh ni loin hmun dang pawh kap tawh turin an duh a ni. Hezbollah hian August 3 khan Israel lamah Katyusha rockets ṭhahnem tak a kah chhuah thu a tarlang.

Israel ṭhianṭha US chuan Israel do rawn a nih chuan a ṭanpui tur thu a sawi ve thung a, US khua leh tuite chu Lebanon chhuahsan turin a hriattir bawk. US chuan Middle East-ah sipai leh ralthuam dah belh a tum thu a sawi a, a indo lawng leh ballistic missile chu Middle East lama dah a tum a ni.

Israel pawhin Palestinian a beihna tawpsan duh loin a chhunzawm zel a, kar liam ta Inrinni khan West Bank chu missile hmanga ṭum hnih kapin mi pakua in nunna an chan. Israel Army-in a tarlan danin rocket kah chhuah hmasa zawk hian lirthei fuhin a chhunga chuang mi panga an boral a, Hamas helpawl mi leh sa an nih thu tarlan a ni. Hemi hnu hian Tulkarem-ah Israel sipai kaptu Palestinian helpawl pali an kap hlum leh tih an tarlang bawk.

Gaza indona tawp tura inbiakna kalpui mek ni mah se boruak erawh a la sang hle a, tharum thawhna a la thleng reng a, nimin khan Tel Aviv khaw bul, Holon-ah Palestinian mi pakhat chuan chemte hmanga mi beiin Israel mi pakhat a thih bakah midang pathumin hliam an tuar a ni. Police in an tarlan danin pitar kum 66 chuan nunna a chan a, mi dang pahnih chuan hliam na tak tuarin damdawi-in lamah tlanpui nghal an ni tih an sawi.