Russia leh China ten insumdawn tawnna tur an pawm

Inrinni khan Chinese president Xi Jinping-a sawm angin Russia president Valdimir Putin chuan China a tlawh a, hetah hian China leh Russia insumdawn tawnna tur, USD tluklehdingawn 50 hu an pawm.

Putin leh Jinping te hian China leh Russia insumdawn tawnna tur thil hrang hrang 30 chuangah te inremna ziakin, he insumdawn tawnna leh thawhdunnaa hma lak dunna tur an pawm a ni. Heng zinga project 12 te chu thawh ṭan mek a ni.

Inremna an siam tam tak zingah hian Russia company-in crude oil ton maktaduai 2.4 zet ChemChina hnena a hralh tur te, Russia Far East-a Rosneft-in petrochemical complex a ruahman mekah ChemChina-in 40% share a neih phalna te, thlawhtheihna lian siam chhuah kawnga thawhdunna te pawh a tel. Moscow leh Kazan inkar, km 700-a zeta thuia rel tlan chak chi kaltirte pawh an ziak. Ei leh bar leh sum leh paiah te, foreign affairs-ah te, infrastructure lamah te, technology leh thiam thil dangah te, agriculture leh cyber space-ah te thawhdunna hi an ziak.

Hei bakah hian sipai leh politics thil lama thawhdunna hrang hrang leh inpuihtawn te, khawvel huap leh an chhehvel bawra issue hrang hranga thawhdunna chungchangte an sawi dun a ni.

Putin leh Jinping te hian NATO sawi chhan takin, khawvel ram hrang hrangte an dinhmun tiderthawng thei thil thleng awm ṭhin leh awm mek chu ṭha lo an tih thu sawiin, ram ṭhenkhatten sipai chakna leh economy-te behchhana hmanga pawl an din leh, an thiam thil sanna leh sipai chakna rinchhana international affairs-a huhang nei a, midangte tana hlauhawm siam chu an duh loh thu sawiin, hei hian khawvel muanna a tiderthawng thei a ni an ti. China leh Russia te hian Europe-a USA-in ballistic missile kahthlakna a bun chu an dem thu an sawi a, S. Korea-a THAAD, missile kahthlakna dah tuma hma a la chu an duh loh thu an sawi.