EU-in Britain chhuak thuai thuai turin a duh

Britain mipuiin tam zawkin European Union aṭanga chhuah an duh tih vote hmanga an lantir hnuah European Union hruaitute chuan Britain chu a chhuahna tifel thuai thuai turin an duh.

European Parliament president Matin Schulz chuan, Britain chu a ram mipui tam zawkin an duh anga a rang thei ang bera EU member a nihna kalsan turin a phut a, UK leh EU inlaichinna hi sawifiah theih loha chiang lo a ni reng ṭhin a, tunah chuan a nihna dik tak a hriat theih ta niin a sawi bawk.

French president Francois Hollande chuan UK-in Europe chhuahsan tura vote hmanga mipuiten an ngaihdan an sawi chuan EU chhunga harsatna siam ṭha tura insiamdanglamna nasa tak a ngaihzia a tilang niin a sawi. German chancellor, Angela Merkel chuan Britain thuthlukna chuan a rilru a tina hle tih sawiin, Europe inpumkhatna chu muanna duhna aṭanga rawn chhuak a ni tih hi EU hian a theihnghilh ngai lo ang a ti bawk.

Mipuiin EU chhuahsan an duh tih an lantir hnuah, Britain hian chhuak tura insiamrem nan kum hnih hun a nei nachungin European Union hruaitute chuan tuna EU member ram 27 ten chhuah an hrehna turin a rang thei ang bera insiamrem thuai thuai turin Britain hi an duh a ni.

Hetihlai hian Britain-ah chuan referendum an neih chu duh tawk loin, mi tam takin referendum buatsaih ṭha leh tura thuneitute kar nan signature an la khawm mek. Mi maktaduai 2.4 ten signature hi an pe tawh a ni.