SCO member puitlingah Pakistan pawm

Shanghai Cooperation Organisation-in Uzbekistan khawpui Tashkent-a summit an neihah, Pakistan chu SCO member puitling atan pawm a ni a, India chuan member puitling ni tura tih ngai eng emaw zat tih tur hmachhawnin SCO Summit hi zawh a ni.

Ningani leh Zirtawpnite khan Tashkent khawpuiah SCO Summit hi neih a ni a, Zirtawpni khan SCO-a Pakistan member a nihna hi Adviser on Foreign Affairs, Sartaj Aziz chuan a sign a, SCO lamah, he pawla member ram paruk Foreign Minister te ṭheuh leh SCO-a Secretary General ten an sign bawk.

Pakistan foreign office chuan, "Kum 2005 aṭang khan Pakistan hi SCO-ah thlirtu ram a ni tawh a, chu mai bakah SCO meeting-te a tel ṭha em em bawk. Hei bakah hian SCO-a thlirtu ramte zinga member puitling nih dil hmasa ber a ni," a ti. Pakistan-in member nih a dilna hi nikum SCO Summit, Russia-a Ufa khuaa neihah khan ngaihtuah a ni tawh a, a thuphunga pawm a ni tawh a ni. Member puitling a nih tura tih tur tuk ang angte a tihkim hnuah Pakistan hi member puitlinga dah a ni ta a ni.

India pawhin member puitling nih dilna a thehlut a, hei pawh hi a thuphunga pawm rih a ni. Member puitling ni tura tih tur hrang hrangte tih a inhuam thu Zirtawpni khan India chuan ziakin, nakkuma Kazakhstan-a SCO Summit neih leh hunah member puitlingah lakluh beisei a ni.

Shanghai Cooperation Organisation hi politics, ei leh bar, leh sipai lama thawhhona atana kum 2001-a Shanghai-a din a ni. China, Kazakhstan, Kyrgystan, Russia, Tajikistan leh Uzbekistan te chu member ramte an ni. Hmasawnna hnathawh kawnga sum leh paia inpuihtawn te, awlsam zawka insumdawnna kawngte SCO hian a hawn bakah, firfiaka chetna do kawngah te, sipaite thawhhona leh intelligence thil inhrihtawn kawngahte thawhhona leh awlsamna a siam a ni. Kum 2005 khan US chuan thlirtu ram nihna dinhmun a dil a, hnawlsak a ni.