Israel leh Turkey-in inrem lehna an siam

Pathianni khan Israel leh Turkey te chuan an inkara inhriatthiam lohna dah boin, inrem lehna thuthlung an ziak dawn.

Kum 2010 khan Israel-in Gaza chu ei leh barah a hrêk a, a hrêk lai hian Turkey lawng, a chhunga Turkey mite chuannain Gaza-a ei tur phurh luh a tum chu Israel sipaiten an bei a, mi 10 laiin an thih phah a ni. Hemi hnu hian Turkey chuan Tel Aviv-a a palai chu kokirin, an insumdawnna leh thawhdunna
ṭhin pawhin a tawpin a tawrh phah a ni.

Israel sorkar thupuangtu chuan Turkey leh Israel ten inremleh an tum thu hi a puang chhuak a, Israel prime minister Benjamin Netanyahu chuan Rome khawpui a tlawh mek a, nimin khan an inremlehna tur hrang hrangte chipchiar zawka puangin, vawiin hian Netanyahu hian an inremlehna turah hian hming a ziak ang.

Israel lam thupuangtu chuan Turkish mi, Israel sipaiten kum 2010-a an thah takte hnenah zangnadawmna tur USD mtd 20 a pe dawn tih a sawi a, Turkey-in an mite thattute an kuta hlan tura a phutna a titawp thung ang. Hei bakah hian ram palai an intir tawn leh bawk dawn a ni. Hei bakah hian Turkey chuan Gaza-ah mipuite
ṭanpuina tur thil a thawn luh phalsak a ni dawn a, a ṭul angin infrastructure lamah sum a invest thei bawk ang. Turkey hmalakna tur phalsak zingah hian chênna tur in saksak leh damdawi in, hum 200 dah theihna tur sak te a tel bawk.

Turkish president Recep Tayyip Erdogan chuan kum 2014-a Hamas ten Israel sipai an thah pahnih ruang emaw, an phumna hmun emaw zawn chhuah a, Israel sorkar hnena hlan let a nih leh theih dan tura theihtawp chhuah a intiam bawk.