Turkey-in Russia hnenah thupha a chawi

Russia president Vladimir Putin chuan Turkey president Recep Tayyip Erdogan hnen aṭangin thupha chawina lehkha a dawng tih Kremlin thupuangtu chuan a sawi. Thuphachawi chhan hi nikuma Turkey-in Russia thlawhtheihna SU-24 a kahthlak vang kha a ni.

Nikum November 24 khan Russia thlawhtheihna bomb thlak chi SU-24, Syria-a firfiakte bei tura a chhuak chu Turkey hian an ram chhunga thlawk nia sawiin a kapthla a, thlawhtheihna khalhtu Oleg Peshkov chu a tlakna hmunah helho ten an kaphlum zui a ni. Hemi hnu hian Russia leh Turkey sorkar an innghirngho a, Russia chuan kawng hrang hrangin Turkey hi a hrek.

Kremlin thupuangtu Dmitry Peskov chuan Russia leh Turkey inlaichinna siamṭha tura Turkey president Erdogan a inpeih thu lehkhaah hian tarlan a ni tih a sawi a, "Turkish ram hruaitu lu ber chuan Russian pilot thi ta chu pawi a ti a, a kalsan tak a chhungte chu a tuarpui hle a, kha thil thleng kha pawi a ti hle a ni," a ti. Lehkhaah hian pilot thi ta chhungte chu Turkish chhungkua ang maia an ngaih thu te, a ruang lalet tura theihtawp an chhuah thute bakah he thilina nghawng ṭha lo a neihte siam ṭha tura Turkey a inpeih reng thute tarlan a ni. Turkey-in thupha a chawina thu hi Turkey chanchinbu Hurriyet chuan a nemnghet bawk.

Thuphachawina lehkhaah hian Turkey chuan firfiakte do kawngah Moscow chu thawhpui a inpeih reng thu tarlan a ni a, pilot thah tak kap hlumtu man chhuah a nih theih nan hnuchhui hna thawh mek a ni a ti. Moscow chuan Thawhṭanni khan parachute aṭanga zuang thla, pilot thattu nia puh, Turk mi Alparslan Çelik chu pilot thih thuah hian a chhuah a, thubuai dang a neih te la ngaihtuah leh tur a ni.

Russian parliament-a upper house-a foreign affairs committee hotu Konstantin Kosachyov chuan, thuphachawina lehkha an dawn hnuah hian Syria leh Iraq-a Turkey policy chu a inthlak danglam a beisei thu a sawi. Russia chuan Turkey chu ISIS te pui ṭhinah a puh a, chu bakah ISIS te tuialhtheih hralhna ber angah a puh bawk a ni.

Turkey hian thla kaltaa prime minister thar an neih aṭangin ram dangte nena inlaichinna kawngah inlaichinna ṭha a awm theih nan hma a la nasa sawt hle. Turkey prime minister thar Binali Yildirim chuan Turkey chu ṭhian ṭha siam a, hmelma siam tlem a ngai niin a lo sawi tawh a, tunkar khan Israel nena an inrem lohna dah ṭhain, inremlehna thuthlung an lo siam tawh a ni.