Istanbul tum hmun beihnaah mi 36 an thi
Thawhlehni khan Turkey khawpui Istanbul-a Ataturk international airport chu silai leh bomb hmanga beih a ni a, mi 36 an thi a, mi 140 ten hliam an tuar.
Turkey official-in a tar-lan-danin, mi pathumte hi Thawh-lehni zan khan airport terminal-ah hian an lut a, silai an hmetpuak a, police-ten an kahlet hnuah an bomb pai an tipuak a ni. Turkey prime minister Binali Yildirim chuan Islamic State-te thil tih niin a sawi. Turkey president Recep Erdogan chuan
ṭum hmun beih aṭang hian khawvel chu nasa lehzuala fimkhur a ngaih thu sawiin, "Istanbul-a bomb puak ang hi khawvela khawpui lian ṭum hmunahte hi chuan thleng ve thei vek a ni," a ti.
Istanbul ṭumhmun beih a nih hnu hian US chuan Turkey chu a mal ṭan lo a, a bulah an ding tlat zel tih a sawi a, German foreign minister Frank-Walter Steinmeier chuan na tuartute an tawrhpui tak zet tih sawiin, Turkey chu an thlawp tlat a ni a ti bawk.
BBC-in a tarlan dan chuan Ataturk airport hi pawikhawih duhte tan chuan a remchang hle. Terminal luh dawnah X-ray scanner a awm a, mahse car tlan lutte erawh an check ziah lem lo niin a sawi.
Turkey PM Yildirim chuan mi 36 an thi tih a sawi chiang a, hliam tam tak an awm thu sawi bawkin, hliam zinga eng emaw zat chu ram dang mi an ni a ti bawk. Turkey PM chuan, "Pawikhawihtute hi taxi hmang-in ṭumhmun hi an thleng a ni," a ti. Turkey-a justice minister Bekir Bozdag chuan hliam tuar hi mi 147 niin a sawi. Hliam tuarte hi taxi hmangin a bul hnai damdawi inah kalpui nghal an ni a, an chhungte awmna chin hre lo mi eng emaw zat chu damdawi in tualah hian pungkhawmin an chhungte an awm leh awm loh an ngaihven. Mi ṭhenkhat chuan an chhungte chanchin chhui zui dan turah sorkarin hma a la chak tawk lo nia ngaiin an thin a rim hle.
Pawikhawihtute mita hmutu chuan kawr dum an inbel a, silai an keng bawk niin a sawi. Social media lama an inbei lai thlalak langah chuan pawikhawihtute zinga pakhat chu police-te nen an inkap a, police-te hian kap fuhin, leiah a tlu a, a tluk aṭanga minute 20 velah a bomb pai a tipuak ta a ni.
Ataturk ṭumhmun hi Europe-a ṭumhmun lûn berte zinga mi a ni. Kum 2015 chhung ringawt khan he ṭumhmun kaltlang hian zin mi, mi maktaduai 61 te chu an chhuakin an lut a ni.
Turkey-a pawikhawihna liante
July 20, 2015 Syria ramri hnaiha Suruc khua, Kurdish mite chênnaah bomb a puaka mi 34 an thi a, IS te mawhpuh an ni
Oct 10, 2015 Ankara railway station pawna muanna kawng an zawhna bomb puakah mi 100 chuang an thi a, IS te tih bawk nia ngaih a ni
Dec 23, 2015 Istanbul veka Sabiha Gokcen ṭumhmunah, Kurdish firfiak TAK nia ngaihten bomb an tipuak a, mi pakhat a thi
Jan 12, 2016 Syrian mi, IS-a tel nia hriatin bomb a tipuak a, German mi 11 laiin an thih phah
Feb 17, 2016 TAK ten Anakara-a sipai chuanna motor convoy an bei a, mi 29-ten an thih phah
March 13, 2016 Ankara-ah car bomb tihpuah a ni a, mi 29 an thi. TAK chuan an tih niin an sawi
March 19, 2016 Istanbul-ah thihchilh bomb tihpuah a ni a, mi 14 an thi a, IS chuan an tih niin an chhâl
June 7, 2016 Istanbul-ah car bomb tihpuah a ni a, police officer pasarih leh civil mi pali an thi. TAK chuan an tih niin an sawi