Missile beih dan zirho

US, South Korea leh Japan te chuan missile hmanga beih an nih pawha lo inven dan leh missile kahthlak dan turte zirhoin, Hawaii vaukam hnaihah missile tracking drill an nei.

US chuan he nunchan zirhona hi Pacific Dragon tiin a vuah a, missile an kap chhuak lo a, mahse missile kahthlakna, a bikin ballistic missile beihna ṭha, Aegis Ballistic Missile Defense System hman dante an zirho. Hei bakah hian an inbiakpawhna leh missile rawn kal lo chhui hna te, data lakkhawm dante pawh an zirho bawk.

Aegis system hi ballistic missile kah-thlak nana siam a ni a, boruaka a awm lai, a la hlauhawm hmaa kahthlakna tur chi a ni.

Pacific Dragon hi North Korea chuan a duh lo hle a, sipai hmanga inchonaah ngaiin, US leh a thurualpuite chu North Korea himna tiderthawngtu an ni a ti. Tunhnaiah NKorea missile technology a ṭhang nasa hle a, vawi eng emaw zat missile a enchhin hlawhchham hnuah tunhnai khan ballistic missile a enchhin a, a kah tum tak a kap fuh a ni.