Visa titawp turin ngen

American senator, Republican mi, Chuck Grassley chuan Obama hnenah ram 23-a mite hnenah non-immigrant leh immigrant visa a pek ṭhin chu titawp turin a hrilh. Heng ram 23 zingah hian India leh China pawh an tel a ni.

Chuck Grassley chuan, "Heng ramte hi keini nena thawhhona ṭha a awm loh avangin an ram aṭang hian ni tin misual pawikhawih ching, tualthah hmangte pawh US-ah an rawn lut reng a ni," a ti a, visa titawp tura hriattirna leh ngenna hi Homeland Security secretary, Jeh Johnson hnenah a thlen.

Kum 2015 chhung khan mi 2,166 te chu US-in a thawhpui ṭhat em em loh ram aṭangin immigrant visa leh non-immigrant visa hmang hian an lut a, kum 2013 leh 2014 chhung khan mi 6,100 hnenah pek chhuah a ni. Heng 23 te zingah hian India leh China bakah, Cuba, Somalia leh Ghana te pawh an tel.