Tuipui inchuh thubuai ngaihtuahna tichhuak ṭep

South China Sea-a China leh ram dangten tuipui an inchuh hmun, Philippines-in Permanent Court of Arbitration-a ngaihtuah tura a thehluh chu he court thutlukna July 12 hian tihchhuah a ni ang.

China chuan tuipui inchuh chungchanga Philippines-in The Hague-a Permanent Court of Arbitration-a ngaihtuah tura a thehluh hi China chuan a tir aṭangina dodal a, a pawm dawn lo tih a lo sawi tawh a ni. Tuipui inchuh chungchangah hian US chuan Philippines sorkar a thlawp a ni.

South China Sea zaa 90 vel zet chu China hian a ram chinah a chhal a, Philippines bakah, Malaysia, Brunei, leh Thailand te pawhin an ramah an chhal a ni.

Chinese foreign ministry thupuangtu Hong Lei chuan, "Court hian thuneihna a nei lo tih ka sawi chhuak leh duh a ni. Hearing buatsaih bakah thutlukna a siam tur a ni lo," a ti. "Ram leh tuipui inchuh chungchangah hian China chuan he buainaa tel ve lo midang (third party) aṭanga thutlukna siam chu a pawm dawn lo a, thutlukna tihluihnaa pawm tura innawr pawh a pawm lo ang," a ti.

Philippines foreign ministry thung chuan court thutlukna chu a pawm dawn tih a sawi a, chutiang bawk chuan ram dangte pawhin an zaha an zawm a beisei tih a sawi bawk. US state department thupuangtu Anna Richey-Allen chuan South China Sea inchuhnaah hian a muanawm zawnga thil kalpui tura US-in a duh thu sawiin, khawvel huapa thutlukna siam theitu court thutlukna pawh pawm theih nise a duh thu a sawi bawk.