Bangladesh PM-in banna a thehlut
Bangladesh ramchhunga nawrh huaihawttuten an nawr angin prime minister Shiekh Hasina chuan nimin khan banna a thehlut tih tualchhung chanchinbumite chuan an tarlang. Hasina hian nawrh huaihawttu mipuite lak aṭanga inhumhimna zawngin Bangladesh a chhuahsan nghal bawk.
Bangladesh-ah hian sorkar hna laknaa quota siam danglam a nih vangin zirlai ṭhenkhat chuan duh lohna an lantir a, a tir lamah tharum thawhna thleng lo mah se sorkar thlawptu zirlaite leh nawrh huaihawttute inkarah Dhaka university-ah buaina chhuakin hemi hnu lamah hian intualvuakna a chhuak zui ta a ni. Supreme Court thupek anga quota siamdan tihdanglam a nih hnuah nawrh huaihawt hi tihtawp lailawk niin, kar liamta kar tawp lam aṭang khan zirlaite chuan PM Hasina bang tura nawrin nawrh huaihawt hi an tharthawh leh a ni.
Tun hnaia buaina chhuak vang hian mi 300 dawnin nunna an chan tawh. August 4, Pathianni khan buaina chhuakah mi 94 thi an awm belh hnuah bandh puan mek ni mah se mipui lungawi lote chuan Dhaka pana kal an tum a, prime minister chenna hmun luh chilh an tum nia tarlan a ni. Mahse he thil a thlen hma hian Shiekh Hasina chuan banna theh lutin, Dhaka chhuahsan nghalin India rama Tripura state khawpui, Agartala a pan nia tarlan a ni. Mahse hei hi official-a sawichianna erawh a awm lo. Sheikh Hasina a tlanchhiat hnuah nawrh huaihawtte hian Dhaka-a a official residence chu luhchilhin, an suasam zui nasa hle. Kum 76 mi, Sheik Hasina hian kum 2009 aṭang khan Bangladesh-ah hian rorelna hi a chelh tawh a ni.
Prime minister Hasina-in banna a thehluh hnuah, Chief of Army Staff General Waker-Uz-Zaman chuan an ram rorelna chu sipaite kuta dah lailawk a ni dawn tih a puang nghal a, nawrh huaihawtte pawh inbengdai a, boruak ṭha leh muanawm siam turin a ngen. Sipai hotu chuan, "Kan ramah buaina nasa tak a thleng mek a ni. Eptu pawl hruaitute pawh ka kawm tawh a, interim sorkar siam kan rel a ni. Mawhphurhna ka la dawn a, in thil phutte pawh kan tihlawhtling ang," tiin mipuite chu tharum hmangin engmah a chinfel theih loh a, ṭha taka thawhpuia an buaina chinfelna tur chu ngaihtuahpui zawk turin a sawm.