UK : Tualchhung buainain zual lam a pan zel

United Kingdom prime minister Keir Starmer chuan ram dang aṭanga pem lutte duh lohna lantir avanga tualchhung boruak a sosan zel vangin nimin khan police hotute nen emergency meeting an nei. UK mipuite hian ram chhunga rawn lutte duh lohna an lantir a ni.

England hmar thlang lam, Southport-ah kar liam ta khan hmeichhe naupang pathum thah niin tualthattu hi Islam kal fawr pawl ami niin thu thehdarh a ni. Hemi vang hian ramdang aṭanga UK-a pem lutte duh lohna lan tir niin Britain mipuite chuan ramchhung hmun hrang hrangah nawrh an huaihawt a ni. UK hian kum 13 chhunga nawrh huaihawtna lian ber a tawk mek a, hmun ṭhenkhatah chuan tharum thawhna thlengin hotel-a inhumhimna zawngte chu bitum an nih bakah chenna in leh lirthei hal a ni bawk. Police officer-te chu brick hmanga beih niin, dawr bungrua tihluihnaa lak chhuah a nih bakah Mosque leh Asia-mite sumdawnna hmun chu beih a ni bawk.

England khawpui lian ṭhenkhat- Liverpool, Manchester, Bristol, Blackpool leh Hull bakah Northern Ireland-a Belfast khawpuiahte tharum thawhna hi thlengin ram chhunga pem luh tih tawp an duh thu an aupui a, 'Lawng rawn lut tur dang rawh u' tiin pem lut phur ṭhintu dan an duh thu an au chhuahpui a ni. Ramchhunga nawrh huaihawt vang hian mi 420 chuang man an ni tawh nia tarlan a ni. UK Interior minister Yvette Cooper chuan nawrh huaihawt mekte chu hnam dang ngaihtheih lohna chawk chhuak turin boruak chu remchanga hmangah a puh.

Bebe King (Kum 6), Elsie Dot Stancombe (kum 7) leh Alice Dasilva Aguiar (kum 9) thattu leh midang 10 hliamtu, Axel Rudakubana chu ram dang aṭanga pem niin social media lamah thehdarh a ni a, hemi vang hian Britain mipuite chuan ramchhunga pem lutte duh lohna an lantir chhunzawm ta a ni. Police chuan tualthattua puh, Rudakubana hi ramdang aṭanga pem lut ni loin England-a piang niin an sawi a, dawt thehdarh vangin buaina a chhuak a ni, an ti. Police chuan English Defence League thawhpui pawl dangte leh anmahni thlawptute chu buaina chawk chhuaktu niin an sawi bawk.