North Korea-in ramri-ah missile launcher dah

North Korea chuan South Korea nena an inrina bulah South Korea leh US pawh kap pha, ballistic missile launcher 250 a dah thar.

Korean Central News Agency(KCNA) in an tarlan danin, Pathiannia an ram khawpui, Pyongyang-a ralthuam thar dahsawnna tur hun hman hi an ram hruaitu Kim Jong-un kaihhruaihna hnuaiah neih a ni. Mipui tam tak pungkhawmin halmawi te halin hun an hmang a ni. An missile launcher-te hi biru taka dah theih leh South Korea leh US beihna atana a ṭul huna hun reilote chhunga hman mai theih tura duan a nih thu an sawi.

Kim Jong Un chuan, "Khawvel huapa venhimna derthawng chho zel leh US-kaihhruai sipaite ramria an inluling zel avangin, kan ralthuam neih ṭhat leh nuclear ralthuam thiltih theihnate hi hman ṭangkai mai theiha dah lo thei loah min siam" tiin a sawi a ni.

Missiles launcher hian a rualin missile pali a pai thei a,chumai bakah short range kah nana hman theih Hwasong 11D pawh a kap chhuak tel thei bawk. Ralthuam lama mithiam te chuan missile te hian km 100 aṭanga km 300 thlenga kah theih thu an sawi a, mahse North Korea hian missile 1,000 chuang an neih erawh a rinawm loh thu an tarlang.