IS ten Syria-ah Kristian 150 an ru bo

Islamic State (IS) firfiakte chuan Syria hmarchhak lama Assyrian Kristian te an rubo a, an mi rukbo zat chiah hi hriatchian a ni lo a, mi 150 vel nia sawi a ni.

IS hian Thawhṭanni khan Hassakeh province-a thingtlang khaw pahnih chu beiin, Kurdish sipaite kut aṭangin an laksak a, hemi hnu hian Kristiante hi an rubo ta a ni.

Firfiakte leh Kurdish sipaite an inbeihna avang hian mi 3,000 vel chu Hassakeh leh Qamishli khuaah an tlanchhia.

Kristian rukbote hi an chanchin hriat zui a ni rih lo a, firfiakte hian an tihlum nghal nge, an la hreng tih hriat tuma ngaihven reng a ni.

Firfiakten Kristiante an rukbo chhan hi tu nhnaia Kurdish sipaiten Syria hmarchhak lamah IS ram luah lakkir tuma an beihna vanga phuba an lakna nia rin a ni. Kurdish sipaite hian firfiakte ram luah lakkir tumin beihpui an thlak chhunzawm zel a, hma pawh an sawn zel a ni.

IS firfiakte hian an ram lak chinah Kristian hmum thianghlim leh biak-in tam tak an tihchhiatsak tawh a, hei bakah hian Kristiante chu chhiah, jizya pe turin an phut bawk.

US chuan Syria rama Kristian pawisawilote rukbo an ni chu a dem takzet tih sawiin, an mi mante hi thu delhkilh awm loa chhuah turin IS chu a phut bawk. US State Department thupuangtu, Jen Psaki chuan, "IS ten sakhua tlem zawkte bitum a, an laka rawng taka an che ṭhin hi kan dem tazket a ni," a ti. Kristian-te chauh ni lo, sakhaw hrang hrang zuitute pawhin IS-te chetdan rawng tak, an mi mante chunga an chetdan rawng takte chu an dem vek a ni, a ti.