Anwar-a chhungte'n Malaysia lal ngaihdamna dil

A mipatpui kawp leh mutpuia puh a nih vanga thiam loh chantir, Malaysia eptu hruaitu Anwar Ibrahim chu kum nga tang turin tun thla tir lam khan hrem a ni a, hei hian politics lama a hmalam hun thlengin a nghawng rin a ni.

Nimin khan Anwar-a chhungte chuan an ram lal hnenah Anwar ngai­dam tur hian an dilsak tih an sawi. A chhungte chuan Anwar hi political prisoner a ni a, tan-ina dah a nih hnu hian tihduhdah a nih bakah a hriselna pawh a ṭha lo hle tih an sawi.

Malaysia hi Muslim ram a nih avangin mahni anpui kawp hi dan kalh leh pawikhawihna lian taka ngaih a ni a, hremna na tak pek theih a ni. Anwar hi eptu hruaitu chak tak, sorkar pawh bei thei ber tura ngaih a ni a, hei vang hian sorkar chuan politics-a a din­hmun tihchhiatna atan thu dik tawk lo hmangin a bei niin amah thlawptute chuan an sawi thung.

Anwar-a hian thiam loh chantir a nih chungchangah ngaihdam dil a tum lo tih a lo sawi tawh a, ngaihdam a dil chuan an puhna chu a pawm anga ngaih a ni dawn niin a sawi.

Mahse Anwar-a chhungte chuan nimin khan thuchhuah siamin, an ram lal hnenah ngai­dam tura ngenna an thlen tih an sawi.