Bangladesh PM hlui manna tur thupek tichhuak

Bangladesh court chuan an ram Prime Minister hlui Khaleda Zia manna tur thupek a tichhuak.

Court hian anti-graft body-in thubuai pahnih a thehluh behchhanin PM hlui manna tur thupek hi a tichhuak a, a rual hian Zia-i party, Bangladesh Nationalist Party (BNP) hruaitu Kazi Saleemul Haq leh sumdawng

Sharfuddin Ahmed-te manna tur thupek tih­chhuah a ni bawk.

Special Judge Court-3 chuan Zia Orphanage Trust leh Zia Charitable Trust graft case ngaih­tuahna tur­ah PM hlui hi a inlan loh avangin manna tur thupek hi a tichhuak a, bail a dilna pawh a hnawlsak nghal.

Khaleda Zia-i ukil, Zainul Abedin Meshbah chuan court-a Khaleda a inlan loh chhan chu security vang a ni tih a sawi. Court-a inlan hnuhnun ber chu nikum December 24 kha a ni.

January 29 khan judge chuan eiruk thubuai pa­hnih siamsak a nihah PM hlui hi February 25-a court-a inlan turin a lo ti tawh bawk.

Nikum March 19 khan Special Judge Court-3 ah Khaleda, a fapa upa ber Tarique Rahman leh midang pasa­rih, Zia Orphanage Trust leh Zia Charitable Trust-a thawkte lakah Anti-Corruption Commission (ACC) chuan eiruk thubuai a lo thehlut tawh a ni. ACC chuan Khaleda leh midangte hian kum 2008,

July thla khan fahrahte enkawlna tura an sum dawn, Bangladesh pawisa, Taka maktaduai 20 chuang (253,164 U.S. dollar) chu an tihchingpen niin a puh.

Kum 2011 khan ACC chuan BNP hotu, Khaleda leh midang pathumte chu a pasal thi tawh hminga a siam, Zia Charitable Trust-in sum a dawn, taka maktaduai 31.5 chu anmahni tana pawtpengah a lo puh tawh bawk.